સૂર્યા એકલવ્ય સૈનિક સ્કૂલ, ખેરંચાએ શામળાજી નજીક અરવલ્લી પર્વતોની વચ્ચે સ્થિત મનોહર સૌંદર્યથી પરિપૂર્ણ પરિસરમાં નિ:શુલ્ક અને ગુણવત્તાયુક્ત શિક્ષણ સાથે અભ્યાસક્રમની પ્રવૃત્તિઓ અને રહેણાંક પ્રદાન કરતી રાજ્યની એક અગ્રણી નિવાસી શૈક્ષણિક સંસ્થા બનવાની લાંબી મંજિલ કાપી છે. પસંદગી પામેલા તેજસ્વી આદિજાતિના વિદ્યાર્થીઓને સુવિધાયુક્ત શિક્ષણ આપવું એ સૂર્યા એકલવ્ય સૈનિક સ્કૂલનો ઉદ્દેશ છે. સૂર્યા એકલવ્ય સૈનિક સ્કૂલનો ધ્યેય એ છે કે વિધાર્થીઓને શૈક્ષણિક, શારીરિક અને માનસિક રીતે મુખ્ય પ્રવાહમાં પ્રવેશ માટે તૈયાર કરવા. તેમજ વિદ્યાર્થીઓ જીવનના તમામ ક્ષેત્રોમાં ખીલે તે માટે શાળા પર્યાવરણ ઉત્તમ તકો પૂરી પાડે છે. શિક્ષણની બાબતમાં વિદ્યાર્થીને કેન્દ્રમાં રાખી શ્રેષ્ઠ અધ્યયન પૂરું પાડવા માટે સક્ષમ અને કાર્યદક્ષ શિક્ષકો અને કર્મચારીઓ પોતાની નૈતિક ફરજો અદા કરે છે. સૂર્યા એકલવ્ય સૈનિક સ્કૂલ (SESS) ની ટીમ એવું માને છે કે ચાર દિવાલોની વચ્ચે અપાતું શિક્ષણ પુરતું નથી. જીવનનું વાસ્તવિક શિક્ષણ અહીં પ્રકૃતિના હકારાત્મક વાતાવરણમાં આપીને તેની જાળવણી કરવામાં આવે છે. આ સત્યને આત્મસાત કરવા ભવિષ્યના રાષ્ટ્રનું નેતૃત્વ કરનાર સારા નાગરિકોનું નિર્માણ તથા પ્રતિકૂળ વાતાવરણમાં પણ ટકી શકે તેવું મજબૂત ઘડતર કરવામાં આવે છે.

સાંપ્રત સમયની માંગના પડકારને પહોંચી વળવા શાળા પ્રશાસન સકારાત્મક શાળાકીય વાતાવરણ જાળવી રાખવા માટે સતત પ્રયત્નશીલ રહે છે, કારણ કે તે દરેકને નિર્ણાયક વિચારો, સક્રિય સમસ્યાનું સમાધાન કરનારા જિજ્ઞાસુ વાચકો, મહંતો, સંશોધકો, પ્રખ્યાત લેખકો અને ઉત્કૃષ્ટ વિચારકો તૈયાર થાય તેમ ઇચ્છે છે. અમારી શાળાના શૈક્ષણિક કર્મચારી સુનિશ્ચિત કરે છે કે સફળતા અને નેતૃત્વ માટે જરૂરી કુશળતા જગાડવામાં આવે. અમારા સૂર્યા ફાઉન્ડેશનના સભ્યો જીવનની મુશ્કેલીઓ વચ્ચે પથદર્શક તરીકે કામ કરે છે અને ઉત્તમતાના સતત પ્રયત્નોમાં આત્મવિશ્વાસ અને સકારાત્મકતા વધારે છે.